17 мај кога се одбележува Меѓународниот ден против хомофобијата, бифобијата и трансфобијата е ден за сериозни разговори и за славење на различностите, изјави холандскиот амбасадор Ваутер Пломп денеска на конференцијата посветена на состојбата со правата на ЛГБТИ луѓето во Македонија и напредокот на земјата во процесот на евроинтеграциите.

„Во Холандија имаме многу дебати за ЛГБТИ заедницата, за борбата против дискриминацијата, како и посебен член од законот кој се однесува на тоа. ЕУ има усвоено насоки токму за овие прашања, кои се темел на демократијата. Многу често правиме измени на законите и практиките, кои се во полза на граѓаните на земјата. Промените во законодавството се важни за сите граѓани, затоа што со нив се промовираат и се подобруваат нивните права, кои се основни и универзални човекови права, како што е правото на живот, правото за безбедност, правото за заштита на законот, право на семејство. Тие се клучни за ЕУ, а мора да се случат и во Македонија. ЛГБТИ лицата мора да станат повидливи, поприсутни во мејнстрим медиумите и дебатите, а политичарите да говорат за овие проблеми како во партиите, така и во јавноста“, рече Пломп.

Ваутер Пломп (Фото: Субверзивен Фронт)

Активистот и претседател на НВО „Субверзивен фронт“, Антонио Михајлов изјави оти и покрај тоа што СЗО ја тргна хомосексуалноста од класификацијата на болести, патологизирањето сѐ уште е присутно за транс лицата.

„Транс лицата се уште ги има во класификацијата, како родова дисфорија. За среќа Македонија ја декриминализираше хомосексуалноста. Последниве 10 години има закони: некои ја имаат сексуалната ориентација како заштитна основа, но родовиот идентитет не фигурира во законодавството, како и самата практика во менување на законите. Македонија е на дното од европските земји. Во 2017 година уште многу прашања стојат нерешени“, рече Михајлов, додавајќи дека Европската комисија ги нотира овие проблеми во извештајот за напредокот на Република Македонија. Тој истакна дека се регистрирани шест кривични дела од омраза и оти пет од нив сѐ уште не се решени, а шестиот наместо како напад од омраза, е класифициран само како обично насилство.

„Сѐ уште немаме Парада на гордоста, немаме јавно истапување на активистите, одговорност на политичарите и на заедницата. Потребна е поголема видливост на проблемите и потребите. Заштитата од дискриминација е приоритет, како и сексуалното образование, кое е неопходно за борба против дискриминацијата и хомофобијата“, порача Михајлов на настанот што се одржа во Скопје.

Тој побара од присутните претставници на партиите и од новата влада исполнување на пет главни точки за унапредување на состојбата на ЛГБТИ заедницата во нашата земја, и тоа: 1. Подобрување и зајакнување на законската рамка за заштита од дискриминација на сите, а вклучително и ЛГБТИ лицата; 2. Воведување на сеопфатно сексуално образование во формалните образовни програми; 3. Реформа на Комисијата за заштита од дискриминација (КЗД) со зголемување на нејзината независност и ингеренции; 4. Решавање на досега поднесените пријави на кривични дела од омраза и говор од омраза врз основа на сексуалната ориентација и родовиот идентитет; и 5. Зголемување на јавната свесност за потребите и проблемите со кои се соочуваат ЛГБТИ лицата и меѓу другото, поддршка во организацијата на Парада на гордоста.

Антонио Михајлов и Дамјан Манчевски (Фото: Субверзивен Фронт)

Потпретседателот на СДСМ, Дамјан Манчевски истакна дека ова е симболичен ден и го поздрави тоа што политичките партии храбро зборуваат на овие теми. Сепак тој истакна дека во самите политички партии не ретко има консензус.

„Што ќе направиме? Сѐ она што ветувавме претходно. Јавно кажуваме дека еден од приоритетите е воспоставување на еден целосно нов систем за отстранување на сите форми на дискриминација, реформирање на КЗД со нови лица кои ќе се посветат на работата на овие права, промена на Законот за заштита од дискриминација. Ќе спроведуваме обуки на судии за препознавање на дискриминација за судска заштита. Сведоци сме на насилства од омраза. Секој треба да ужива во своите човекови права без разлика на неговата сексуална ориентација. Јавно признаваме дека оваа категорија луѓе годиниве се една од најдискриминираните граѓани во Македонија“, рече Манчевски.

Тој истакна дека државата наместо говор на омраза, ќе промовира толеранција кон сите што се различни и оти ЛГБТИ заедницата има партнер во новата власт.

Антонио Михајлов и Ивон Величковски (Фото: Субверзивен Фронт)

На конференцијата беше доделена и наградата „Поддржувач на годината“, која годинава му беше врачена на лидерот на Либерална партија, Ивон Величковски.

„Ова не е признание за мене, туку за екипа на луѓе кои веруваат во слобода и слобода на сите. Во следните кампањи да немаме одредба за што се залагаме, тоа да биде веќе имплементирано. Останете истрајни на својата верба и својата определба, остануваме доследни во она што го застапуваме“, изјави Величковски во својот говор пред присутните примајќи ја наградата.